نئی دہلی، 2؍جنوری (آئی این ایس انڈیا) دہلی کے پولیس کمشنر ایس کے این شریواستو نے ہفتے کے روز فطری موت اور حادثاتی موت کے ساتھ ساتھ خودکشی کے معاملات میں فورس اہلکاروں کے لئے انشورنس کور میں اضافے کا اعلان کیا ہے۔

نئے سال کی مبارکباد دیتے ہوئے شریواستو نے کہا کہ 40 سال سے زیادہ عمر کے تمام پولیس اہلکار لازمی طبی معائنہ کروائیں گے تاکہ کسی بیماری کا بروقت پتہ چل سکے اور علاج شروع کیا جاسکے۔ کمشنر نے کہا کہ گذشتہ سال چیلنج سے بھرا تھا اور کووڈ 19 وبا کی وجہ سے پولیس اہلکار ذہنی، جسمانی اور سرکاری طور پر بڑے دباؤ میں تھے۔

انہوں نے ایک بیان میں کہاکہ 7612 پولیس اہلکار پیشگی محاذ کے اہلکاروں کی وجہ سے کورونا وائرس سے متاثر ہوئے ہیں۔ ان میں سے 7424 صحت یاب ہوئے اور وہ ڈیوٹی پر واپس آئے جب کہ 32 کورونا وائرس کی وجہ سے فوت ہوگئے۔ اتناہی نہیں دہلی پولیس کے 231 اہلکار فطری موت سے ہلاک ہوئے، 44 حادثے میں ہلاک ہوئے جبکہ 14 پولیس اہلکاروں نے خودکشی کرلی۔

انہوں نے کہاکہ اس سے ظاہر ہوتا ہے کہ پولیس اہلکاروں کو شدید جسمانی اور دماغی صحت کے خطرات لاحق ہیں جن کی دیکھ بھال کرنے کی ضرورت ہے۔ کمشنر نے کہاکہ قدرتی موت کی صورت میں انشورنس کا کور 5 لاکھ سے بڑھا کر 28 کردیا گیا ہے، جبکہ موت کی صورت میں اسے 30 لاکھ روپے سے بڑھا کر 78 لاکھ روپے کردیا گیا ہے۔انہوں نے کہا کہ خودکشی کی صورت میں کنبہ کی مدد کے لئے 10 لاکھ روپے کی مالی امداد کی فراہمی ہے۔